كامل وسائل السفر والهجرة لبلاد الله Full means of travel and immigration to the country's God

من الاخر وعشان يكون كلامي مباشر وله هدف مركز .. بما ان الموضوع ده طويل عريض .. واتهرس في اكتر من مليون فيلم هندي ومقال وبوستات بالمليارات عالنت .. فهنا هحدد المستهدف من كلامي : 

*

( الشخص العربي وخصوصا " المصري " – معاه شهادة جامعية – ممعهوش فلوس وهايستلف حتى لو مصاريف السفر مية جنيه – أأمن الطرق للسفر طويل الأمد .. مش تروح تتفسح وترجع – الدراسة المجانية مش اللي هاتكلفك مليم – بهاريز البهاريز لأفضل فرص السفر مش العاطل في الباطل – المنح ( ام بلاش ) واللي بتقبل ( عدد كبير ) من الطلاب مش المنح بتاعة 300 طالب .. واللي هدفها تجميع بيانات الملايين وتكوين ارشيف دعاية بيهم .. تبيعهم بعدين للي يدفع )

*

أولا .. ليه بنطفش من بلادنا :

**

بنطفش من بلادنا لأكتر من سبب ..

طلب الرزق والاستقرار : لما مش بنلاقي مستوى معيشي كويس في بلادنا .. والحياة فيها تبقى صعبة علينا وعلى أهالينا .. واللي جاي فيها مش بيبقى قد اللي رايح .. او مش بنلاقي فيها جاي اصلا .. وكله بيبقى رايح رايح رايح .
*
طلب العلم : لما نكون عايزين نكمل تعليمنا بشكل افضل .. ومعاه برضه تعليم ولادنا .. في بلاد لسه بتحترم قيمة العلم والمتعلمين .
*
الحروب والنزعات السياسية : لما تكون حالة البلد مش مستقرة سياسيا واقتصاديا .. أو فيها حروب قتالية أو كلامية .. والكل فيها خايف من اللي جاي .. والحاضر بيقولك ان المستقبل اسود منه مافي .. واللي يشوف الغيام في السما ومايقولش ان السما هترخ عليه أمطار وسيول .. يبقى حاجة من الاتنين يا أعمى يا أهبل .
*
سنة الله والرسل : لما تكون طموح وبتسعى للافضل .. أو متدين وعارف ان القران الكريم أقر بالهجرة في حالات الضيق :

( وَمَنْ يُهَاجِرْ فِي سَبِيلِ اللَّهِ يَجِدْ فِي الْأَرْضِ مُرَاغَماً كَثِيراً وَسَعَةً ) النساء/100
( ثُمَّ إِنَّ رَبَّكَ لِلَّذِينَ هَاجَرُوا مِنْ بَعْدِ مَا فُتِنُوا ثُمَّ جَاهَدُوا وَصَبَرُوا إِنَّ رَبَّكَ مِنْ بَعْدِهَا لَغَفُورٌ رَحِيمٌ ) النحل/110
( إِنَّ الَّذِينَ تَوَفَّاهُمُ الْمَلَائِكَةُ ظَالِمِي أَنفُسِهِمْ قَالُوا فِيمَ كُنتُمْ ۖ قَالُوا كُنَّا مُسْتَضْعَفِينَ فِي الْأَرْضِ ۚ قَالُوا أَلَمْ تَكُن ْأَرْضُ اللَّهِ وَاسِعَةً فَتُهَاجِرُوا فِيهَا ۚ ) النساء/ 97
أو الرسل اللي هاجروا من بلادهم بحثا عن الافضل .. زي هجرة سيدنا محمد ( ص ) من مكة للمدينة .. وعاش ومات في المدينة رغم فتحه لمكة .. وهجرة السيدة مريم بابنها سيدنا عيسى ( عليه السلام ) .. وهجرة سيدنا موسى بقومه .
*
ثانيا .. اسهل طرق الكتتان .. والهجرة والزوغان
**
1 - برامج الهجرة :

ودي مجموعة برامج بتقدمها كام دولة للهجرة لها عن طريق القرعة .. وبيقدم فيها سنويا ملايين الناس .. وممكن تقدم في واحدة فيها جايز ربنا ياخد بيدك .
*
– قرعة الفيزا الامريكية :

دي يامعلمين قرعة بتعملها أمريكا كل سنة .. وبيفوز بيها 50 الف شخص بالكارت الاخضر للاقامة الدائمة ( الجرين كارد ) .. كده من غير أي حاجة .. ودي اسهل وارخص وسيلة تدخل بيها امريكا وتعيش وتستقر فيها .. وبيحلم بيها ملايين البشر كل سنة .. واحلى حاجة فيها انك مش مجبر تروح امريكا في الان واللحظة .. لأ أبدا .. دي بتبقى في جيبك ووقت ما تزهق من بلدك .. اتكل عالله على امريكا .
شوفها من هنا : https://goo.gl/jrNERS
*
– طلبات الهجرة لبلاد الله :

وغالب البلاد الكبيرة والغنية تقدر تقدم لها طلب هجرة .. والخارجية عندهم بتقييم اوراقك .. ويا إما تقبله يا إما لأ .. ولو قبلته فهتروح على حسابك .. وتدور انت على شغل وسكن وكل حاجة .

ده برنامج الهجرة السريع لكندا :
http://goo.gl/Of2VPy
دي الهجرة لاستراليا :
http://goo.gl/CKqDQz
*
2 - الزواج :
ودي من اسهل الطرق للاقامة الدايمة .. ومن بعديها الجنسية والعمل والاستقرار .. وهي انك تتعرف على بنت اجنبية .. وتقبل انها تتجوز سيادة حضرتك .. وتبعت لجوزها حبيبها – اللي هو انت - للاقامة معاها في بلدها .. والطريق الشرعي للكلام ده .. هو المعارف والاصحاب والاهل والخلان .. والطريق ابو سكك وحورات .. انك تشقط البونية المصونة من عالفيس بوك وتويتر .. وكذلك للبنات العكس بالعكس .
*
3 - سفر بلا تأشيرة :
فيه دول كتير بتقبل دخول المصري من غير تأشيرة .. وبتديه اقامة مؤقتة فيها او دايمة .. فممكن تتصاحب على حد في الدول دي عن طريق مواقع التواصل الاجتماعي ( فيس بوك – تويتر .. الخ ) .. وتروح له وتدور على شغل هناك خلال مدة اقامتك .. وترجع بلدك بعقد عمل منها .
شوف الدول دي من هنا : https://goo.gl/BTHkmb
*
4 - السفر السياحي :
ودي انك تاخد تاشيرة سياحية لاي بلد خلقها ربنا .. وتروح تقعد فيها كام يوم تشوف الجو وتييجي تاني .. والموضوع ده ابدعوا فيه ناس كتير غيري .. وطبعا اكمنه لا يؤدي لاستقرار .. فمش هتكلم عنه .. لكن افضل صفحة شفتها اتكلمت عنه هي صفحة سافر .. وانا اشتريت كتابهم من فترة كبيرة .. وهو غني الصراحة بالمعلومات المفيدة في السفر السياحي الرخيص .. ممكن تشوفها من هنا :
https://goo.gl/Lp2aV0
*
5 - السفر للزيارة :
وده انك تخلي واحد قريبك او صاحبك يبعت لك تأشيرة زيارة .. مؤقتة طبعا .. وبتروح تشوف البلد برضه وبترجع تاني .. وجايز تلاقي فيها شغل .
*
6 - دعوة الشركات :
وده لو انت شغال في شركة لها فروع عالمية .. او لها علاقات عالمية مع شركات تانية .. فيقدورا يعملولك تاشيرة زيارة .. تروح وتيجي عليهم .. ودي برضه زي اللي قبلها واللي قبل قبلها مالهاش استقرار .
*
7 - الاستثمار :
ودي اما يبقى معاك قرشنين محيرينك .. فكل دول العالم بتديك حق الاستثمار فيها .. وطريقتها انك بتحط فلوسك كاش في بنك بيحددوه هم .. وتصرف منه عالمشروع اللي هاتعمله .. والحد الادنى للمبالغ بتختلف من دولة لدولة .. لكن ده مش للغلابة اللي زيينا .
*
8 - اللجوء :
ده لو من المشاهير المضطهدين .. أو من بلد فيها حروب اهلية .. أو نابغة عصرك وأوانك وعامل في بلدك اللي لا يعمل .. ومحطوط عليك فيها .. ومش طايقينك عشان انت معديهم بمليون سنة ضوئية .. فكل اللي هاتعمله انك تاخد البازابورط .. وتحجز تذكرة سفر سياحية لبلد فيها حق اللجوء وترتيبهم كالتالي ( السويد – المانيا – النرويج – النمسا – هولندا - الدنمارك ) .. حتى ولو استلفت فلوس التذكرة .. وساعة ما توصل البلد .. تقدم طلب لجوء وتقول فيه اللي بيحصل لك في بلدك .. وانهم بيطفوا السجاير تحت بطاطك .. وساعتها بتاخد لجوء وبتعيش براتب يكفيك انت وآخر اسم في سلسلة عيلتك في بلدك ( مش اوي كده بس بتاخد اوبيج حلوا ) .. لكن الاكتر بيدوك بالشلوت .. عشان اكتر اللي بيروحوا للموضوع ده نصابين .. الا اللي عندهم كوارث في بلادهم .

ودي طريقة اللجوء عشان اللي عايز يستزيد ويستفيد :
https://goo.gl/FLiCwg
http://goo.gl/F1AiFs
*
9 - العمل ونظام النقاط :
وده لكام بلد عندها قلة أو عجز في عدد مهن معينة زي ( كندا واستراليا ) .. وهي انك بتقدم على هجرة عمل للبلاد دي على المواقع الحكومية بتاعتها عالنت .. وعلى حسب النقط دي على حسب ما يدوك اقامة مؤقتة أو دايمة .. وبتتحدد النقط دي على كذا عامل منها ( العمر الصغير - مستوى التعليم – اللغة الاولى – اللغة التانية – الخبرة في العمل وشهادتها – المهارات التانية اللي ممكن تشتغل فيها في حتة تانية – فرص العمل اللي معاك – وشوية لباقة وحداقة وبقاقة ( تكون انسان بوء يعني ) ) .

دي الهجرة لكندا بالنظام ده :
https://goo.gl/VK7lST
ودي الهجرة لاستراليا بالنظام ده :
http://goo.gl/9yvWqs

وفيه طريقة تانية أصعب لنفس الموضوع .. وهي انك بتقعد على مواقع التوظيف الخاصة بالبلد اللي انت عايز تهاجر لها .. وتشوف وظيفة تناسب مقام معاليك .. وتتواصل بطريقة مباشرة مع الشركة اللي عايزه الموظف .. وتوريهم انك احسن واحد في الدنيا دي كلها اللي يقدر يقوم بالشغلانة دي .. وتعرض عليهم براءات اختراعاتك في ناسا .. وسفرك لكوكب بلوتو قبل ما يكتشفوه .. واكتشافاتك لمعادن جديدة في لب الكرة الارضية .. فلو لفقت معاك وردوا عليك بإيميل ( وده نادرا ) .. امسك فيهم بايدك وسنانك .. واما ربنا ينفخ في صورتك وخدت منهم عقد ان شالله بكام شهر .. فهتسافر لهم وهتدخل على طول في نظام النقاط .
*
10 - التعليم والمنح :
ودي اخر حاجة .. لانها السهل الممتنع أو السكة السهلة الصعبة .. استعنى فيها عالشقى بالله ..

المنح موجودة في كل بلاد العالم المتحضر .. وهي انهم بيقدموا عطايا دراسية للطلاب من كافة دول العالم .. يعني يعملولهم تسهيلات في السفر والاقامة والمعيشة عشان يكملوا تعليمهم في بلد معينة .. وساعات المنح دي بتكون بزيرو تكاليف .. يعني بيشيلوك هيلا بيلا لحد ما تخلص علامك .. او ساعات انت واسرتك كمان .. واوقات المنح دي بتكون جزئية في المساعدة .. وهي انهم يدفعولك مبلغ معين كل سنة وانت عيش مع نفسك كفاك ولا لأ .. مالهمش فيه .. بس اهم حاجة في الاتجاهين انهم بيدخلوك البلد من بابها من غير مرمطة .. وعشان قصة المنح كبيرة وكتيره ، فهاكتب لكم هنا أفضلها بشرط تكون منح عامة تشمل كل التخصصات .. مش منحة في تخصص معين :
*
1 - برنامج تشيفنج ( المملكة المتحدة ) :
الحكومة البريطانية بتتكفل بيك كدارس ماجستير .. واعدادك كقيادي ورائد أعمال وصانع قرار في مختلف المجالات .. بصوا عليها من هنا :
http://goo.gl/uqFPh6
*
2 – منحة فولبريت ( أمريكا ) :
الميزة فيها انها بتقبل عدد كبير جدا من مختلف دول العالم .. وناس كتير من مصر والوطن العربي قبلوا فيها .. وقصص النجاح فيها كتير عالنت .

كل حاجة عالمنحة دي من هنا :
http://goo.gl/py4ABl
ودي كل المنح اللي بتقدمها امريكا :
http://goo.gl/jHyGvw
*
3 – برنامج أيراسموس موندوس ( الاتحاد الأوبي ) :
وبالرغم من اسمه الملعبك .. الا انه مش منحة واحدة ولا اتنين .. لأ ده برنامج منح عدده 11 الف منحة .. بتقدمها دول كتير في الاتحاد الاوربي .. مربوطين بالبرنامج ده .. والحلو فيه انك بتقدم في مكان واحد .. وهم بيشوفوا المكان المتاح عندهم .. والاحلى انهم بيصرفوا للطالب 21 الف يورو سنويا قابلة للزيادة .

تقدر تعرف اكتر عنه وتقدم له من هنا :
http://goo.gl/vCsgom
*
4 – منح الهيئة الألمانية للتبادل العلمي (DAAD) ( ألمانيا ) :
وده برنامج كبير بتموله الحكومة الالمانية كل سنة .. وصل عدد المنح فيه 535 منحة .. بتدخل وبتختار واحدة منهم وتقدم فيها .
http://goo.gl/r29wLy
*
5 – منحة الحكومة الفرنسية ( فرنسا ) :
وده نظام ممول من الحكومة الفرنسية حطت له 100 مليون يورو سنويا .. عشان تعلم الناس في مختلف دول العالم وخاصة الدراسات العليا عندها :
http://goo.gl/37yFHt
http://goo.gl/4Cxnlx
*
6 – منح الحكومة اليابانية ( اليابان ) :
طبعا هي من افضل المنح .. وممكن يكون ترتيبها الاول .. لكن عشان عائق اللغة اليابانية اللي لازم الدراسة تكون بيه .. فخلتها في مركز متأخر .
http://goo.gl/a3LXeH
*
7 – الحكومة الكندية ( كندا ) :
برنامج الحكومة الكندية عالموقع الرسمي لهم بيقولوا انها بتقدم اكبر عدد من المنح في العالم .. بيوصل لـ 60 الف منحة سنويا .. لكن كل منحه منهم بتاخد عدد قليل .. وده اللي خلاني اجيبها في الاواخر :
http://goo.gl/fqPyFd
*
8 – منح الحكومة الاسترالية ( استراليا ) :
استراليا على موقعها الرسمي بتقول انها بتدفع 200 مليون دولار لتمويل المنح الدراسية سنويا .. وعندها كذا نظام ملائم للطلاب من الشرق الاوسط خصوصا .. خليتها في الاخر عشان بعد استراليا عنا .
https://goo.gl/aZQCNY
*
9 – منحة السويد ( السويد ) :
ودي هايخلص التقديم فيها كمان خمس ايام .. واحسن حاجة فيها التسهيلات الواضحة لها .. وكمان تمويلها الكامل للطالب في الدراسة والمعيشة .. وكمان استقدام الاسرة .. لكن عشان محدش جربها .. فمحطيتهاش في مركز متقدم .
http://goo.gl/iwIOPZ
*
10- منح متعددة ( كل الدنيا ):
ودي للناس اللي سألت عن ( كوريا وتركيا وماليزيا وروسيا وايطاليا .. الخ )

هنا موقع جايب كل المنح في كل بلاد العالم .. العلوي والسفلي الشرقي والغربي .. اذا حبيت تروح تدرس في دولة معينة فعليك بها :
http://goo.gl/rtMFdH
*
واخيرا عشان تضمن ان ربنا يوفقك في واحدة منهم .. لازم تكون جاهز ببياناتك وشهاداتك وصورة شخصية بخلفية بيضا وجواز سفر صالح .. وتوكل على الله وقدم في عدد كبير من المنح .. وفي كل الدول .. واياك انك تزهق .. جهز سي في طويل عريض .. وكل ما تلاقي نفسك فاضي قدم في واحدة .. وكله عالنت .. واستعين بالله .. ثم باللي قدموا قبلك .. عشان تعرف منهم انت بتتقبل ليه ؟ وبتترفض ليه ؟ .. وده عن طريق كتابة اسم المنحة في الفيس بوك رأسا .. وبتشوف مين اللي فاز بيها قبلك .. وتحاول تراسله ..

( معلومة فنية : الفيس بوك بقى زي جوجل .. بيبحث في كل حاجة عليه زي البروفيلات والصفحات والمناسبات والبوستات .. " لسه التعليقات ، بس ربك يسهل " .. معلومة تانية : اسوأ وسيلة عالفيس بوك انك تتواصل مع حد ما تعرفوش هي الرسائل .. لانها بتدخل في الرسائل العشوائية مش في صندوق الوارد .. فصاحبها مش هايشوف رسالتك .. فاسلم طريقة هي التعليقات اذا كان فاتحها صاحبها .. أو حد من اصحاب الراجل ده ويكون فاتح تعليقاته .. فتستاذنه يوصلك بصديقه ) ..

اخيرا نمي مهاراتك اللي تأهلك للمنحة .. وفي المقام الاول لغة البلد .. والنظام اللغوي اللي عايزينه لشهادة اللغة دي ان كان ( تويفل : على النظام الامريكي ) أو ( ايلتس : على النظام البريطاني ) .. لانها من اهم اسباب قبولك في المنحة .. وطبعا لو معاك لغة تالتة .. أو تقدر تتعلم لغة بلد مختلفة عن الانجليزي هتزيد فرص نجاحك بالمنحة عشان قلة عدد المتقدمين .. ولا انصح بالمكاتب الوهمية اللي بتقولك هتجيب لك منحة .. اسال اوي الاول عنهم ويكون حد جربهم وكمان نجح .
*
وفيه طريقة تعليمية تانية .. وهي السفر لدورات اللغة الانجليزية .. ودي بتبقى 3 شهور او 6 شهور في كذا بلد .. زي امريكا وبريطانيا وكندا .. على حسابك ومن جيبك .. وخلال الفترة دي بتحاول تزنق نفسك في أي منحة من المنح هناك .. والناس هناك حفظوا الموضوع ده عن ظهر قلب .
*
وفيه طريقة تالتة واخيرة .. انك تخلي جامعتك هي اللي تجيب لك منحة .. وده طبعا للمعيدين والدكاترة والاساتذة الجامعيين .
*
ثالثا .. ايه هي بلاد العيشة المرتاحة .. للسفر والسياحة .
**
انسب الدول اللي بينصحوا انك تسافر لها .. هي الدول المستقرة سياسيا واقتصاديا ومؤشر السلام الاجتماعي فيها عالي .. ومتوسطات رواتبها عالية .. وتقدر تتكلم لغتها .. ويكون فيها ناس كتير من ولاد بلدك ودينك .. وده لمصلحتك أولا ..

طيب البلاد دي زي ايه ؟

*

1 - أمريكا : 

القوة العظمى في العالم .. وأرض الاحلام .. واغنى واقوى بلد بلا منازع .. العرب حافظينها من افلامها ومسلسلاتها .. والجالية العربية وخصوصا المصرية هناك كبيرة جدا .. فعدد العرب هناك وصل 3.6 مليون عربي منهم 900 الف مصري .. اكتر العرب والمصريين في ولاية كاليفورنيا (324 الف ) وميتشجن (223 الف ) ونيويورك (152 الف ) .

*

2 - بريطانيا :

من اكثر البلاد استقرارا سياسيا واقتصاديا وأمنيا .. والعدالة فيها للسما وده عالكل .. والتعليم والصحة شبه مجانا لكل المقيمين فيها .. ومستوى المعيشة فيها ممتاز .. وتعتبر اكتر دولة احتواءا للمهاجرين العرب والمسلمين خصوصا .. وفيه احياء كبيرة لهم هناك .

*

3 - كندا :

مصنفة من افضل عشر دول للمعيشة بحسب الامم المتحدة .. فهي بلد بعيدة عن النزاعات الاقليمية .. ومشمولة بنظام الرعاية الصحية .. ومستوى المعيشة فيها ممتاز ( 70 % من الكنديين عندهم بيوتهم الخاصة ) .. وبيئة جميلة .. وبلد بتحب المهاجرين ليها .. عكس بعض الدول التانية .

*

أستراليا و نيوزيلندا :

بلاد هادية .. منظمة .. آمنة .. بعيدة عن هري دول العالم .. فهم يعتبروا قارة لوحدهم .. ومستوى المعيشة والنظام السياسي والصحي والتعليمي فيهم ممتاز ... ما يعيبهم هو بعد المسافة الكبير بينا وبينهم .. يعني لو حد مات له حد .. مايفكرش يحضر الجنازة .. الا لما يخترعوا بوابات السفر عبر الزمن .

*

ألمانيا :

بلد قوية .. وصناعية في المقام الاول .. ومقصد كتير من العلماء والمهنيين الحرفيين من مختلف بلاد العالم .. ده غير النظام والامن فيها .. ونزلتها تحت شوية عشان عائق اللغة الالمانية .. وكمان عشان فيه شعشعات مغرضة بتقول ان الشعب الالماني شعب عملي جاف .. وغير ودود مع الاجانب .

*

اليابان :

طبعا ده كوكب تاني .. وكل الكلام عليه اكنهم عايشين زي الروبوتات كل واحد له مدار خاص بيه .. والحكومة بتصرف صرف كبير جدا عالبلد وبنيتها التحتية والفوقية والوسطية كمان .. ومستواها المعيشي والحضاري كبير جدا .. لكن عائق اللغة اليابانية والمسافة هايبقى كبير برضه .

*

السويد و الدنمارك والنرويج وفنلندا :

من اعلى مستويات السلم الاجتماعي والمعيشي والحضاري والتعليمي .. لكن اجوائهم شديدة البرودة .. ولغتهم المختلفة يخلونا نفكر كتير قبل ما نروح لهم .

*

البلاد العربية :

السفر له طريقه واحدة وهو تأشيرة العمل او الاستثمار .. وده حكيته في بوست السفر للسعودية .. ولما بحثت عن الدول التانية زي الامارات والكويت وقطر ودول شرق افريقيا زي الجزائر .. لقيتهم قريبين اوي من بعض فمش محتاجين بوست خاص .. ومعظم البلاد العربية قوانينها في العمل منحازه لابن البلد عن المغترب .. مهما قلنا غير كده .. فيه بلاد بتزيد فيها نسبة العدالة عن التانية .. لكن مش زي البلاد الاجنبية طبعا اللي بيتساوى فيها الكل قدام القانون والدستور .

*

رابعا .. كام تنين مجنح بيبخ نار .. حايقابلني في بلاد بره :

**

لو مش مسافر نظامي فيا ويلك ياسواد ليلك .. هم بالليل وغم بالنهار .. وهتتمنى ترجع بلدك كل ثانية .. لانك خايف تتمسك وتترحل .. او تتظلم وماتعرفش تاخد حقك .. لانك بالنسبة للحكومات انت مش موجود هناك اصلا .. وكمان فرص العمل اللي هتشتغلها كلها دون ادنى مستوى .. اما لو مسافر نظامي فهاتواجه اللي جاي ده :

*

الغربة :

وده شعور الحنين للوطن .. وعشان تقدر تقاومه .. لازم تسافر على بلد فيها كتير من ولاد بلدك .. ولو لقيت واحد وحش تلاقي عشرة غيره حلويين .

*

الشغل والمصاريف :

وده انت وشطارتك بعد حالة الاستقرار .. لكن الميزة في الدول المتقدمة ان اللي بيتعب في تعليمه ومهنته بيلاقي احسن مكان ومكانة .. مش زي عندنا هتاخد شهادتك وتآنس الوالدة في البيت .

*

الحياة الشخصية والاجتماعية :

معظم قصص الزواج من اجنبيات ناجحة ( على ما قريت ) .. فاذا اتيحت لك الفرصة وما لقيتهاش في بلدك فتوكل على الله .. لكن طبعا لو كانت في ديانتك هتبقى أفضل طبعا طبعا .. أما بخصوص العلاقات الاجتماعية .. فالناس هناك مش هاتلاقيها فاتحالك دراعتها وفارشين لك الارض فل وياسمين .. اعمل نفسك واصنعها صناعة الاول .. وبعدين شوف الناس هتعاملك ازاي .. فالناس ليها الظاهر في كل الدنيا حتى في بلدك .

*

الحكومات والعدالة :

معظم الدول اللي ذكرتها مستوى الامن والعدالة فيها كبير .. ولو لك حق هتاخده هتاخده .. ومش هايضيع عليك .. ومن خلال قراياتي لقصص نجاح ناس في الغربة .. او بلاد المهجر .. كلهم بينصحوا انك ما تمييلش اوي على حكوماتك العربية .. وخصوصا المصرية في سفرك .. وخليك في قوانين البلد اللي سافرت لها ورضيت باحكامها وقوانينها ودساتيرها .. لان ده له شقين .. في حالة لو بلدك وقفت جنبك .. فآخر حاجة هتعملهالك هو انها ترجعك بلدك من تاني ( ومش ده اللي انت عايزه ) .. وفي حالة انها ما وقفتش جنبك وحطت عليك .. هتبقى مجرم في نظر البلد اللي انت فيها .. وفي الحالتين انت الخسران .. خلي علاقتك بحكومة بلدك استشارية فقط افضل لك .. لان بصراحة هي مش ناقصاك .. والمشرحة مش ناقصة قتلة .. أما لوحد اتعك أوي ميقولش احمد محسن اللي قالنا .. ويدعي عليا عشان عندي عيال بربيهم .

*

المدة وطول الامد :

معظم اللي مسافر عنده آمال عريضة انه هيروح يلاقي تلال دهب .. وكل اللي عليه هو انه يدور على كام شوال وحتة فاس ويكسر ويعبي الدهب .. لكن الايام بتثبت له عكس كده .. وانه بيروح يشتغل زيه زي غيره .. وفلوس شغله بتتصرف على حياته وعيشته ورفاهيته .. والشخص المميز فقط هو اللي بيعرف يعمل له شغل خاص .. لكن بعد كحرتة ومرمطة حلوة .

*

أخيرا :

السفر من أفضل الوسائل اللي بتغير حياة البني ادم للافضل .. باللذات لو كان سفر شرعي وقانوني .. وأنصح بيه أي حد مش مستريح في بلده .. لانه مهما كان بيبقى تجربة عملية .. وبلدك هتفضل بلدك .. ترجع لها وقت ما انت عايز .

***

شير للغير ..